Moandagmänn’n
Redactie
Redacteur

Vrog ter uut. De mèèst’n, een betje brak in de hoed. Det kan ôk neet ààns, noar drei daag’n karmse. Ie vroagt oe of, hoe hôôlt ze ’t vol en nog meer, hoe heult de portemonnéé het vol. Hèèl makkelijk, den loaj’ in huus. Ie hôôlt de telefoon mar an en ie hebt betaald. Ie zeet de jonge lèu oaver de kop kèukeln in ne onnoavolgbaare drèèimölle. Zelf bliej lekker met bèire beene op de grôônd. Àj’t nog neet an ’t harte hebt, zôj’t doar krieg’n. Èèm’n noar ’t vèurwark, te laate! Knapp’n en rôôk’n, volgens de lèu heij’ der neet völle an e mist. Het is ter wier ôôlderwets gezellig en noa een paar bezeukjes an de olifantjes en de dobberende èind’n, goaj’ met ne buul vol olieboll’n op huus an. Zelfs de allerleste vakààntiegangers bint eerder wier ekömm’n vuur de Battemse Karmse. Moandagmänn’n, op tied der uut. Èèm’n blood gèèm’n, kiek’n of alles van binn’n nog op orde is. Möt könn’n, want veerder is ’t röstig, gen schoap’nmark, gen krèuime en gen rommelmarkt. Wiej lèèft in nen ààndere tied. Neet meer in huus kômm’n met ne bok of vèèr bezundere kipp’n. Gen marktjässe meer an de tap, mà hèèle ààndere uutdossing’n. Het Battemse gekk’nuurtje begint gelukkig laater op männ’n. Èèrs èèm’n noar de pille en dan ôônderduuk’n in ne dag vol met muziek en wille. Tèèng’n de tied dàj’ de kràànte ôônder ôôg’n kriegt, bint de karms’nkeerls à wier vertrökk’n. Het saldo op de rekkening zut er uut as ne zak vol siepels. Het kômmende joar mà wier spoar’n vuur de karmse, diet netuurlijk möt bliem’n. Petje of vuur de organisatoor’n. Wat een wark en wat een rèègeltjes. Mèikes wordt in de tasse ekekk’n of ze ôk geveuirlijk spul biej zich hebt. Nen ôôle opa met ne kinderwaag’n mag gewoon duur lôôp’n. Het bint àmoa rèègeltjes, woer ze zich an möt hôôld’n. Loaw we hopp’n det ’t helpt en det er gen narighèid is ewes. Het weer heiw we met ehad. Lekker met nen ijsco op de voes, dààns’nd op de keiharde klàànk’n van de muziek. Lekker röstig biej het Kultuurhuus. Iedereen hef wier könn’n geniet’n van de Battemse Karmse. Noe nog wacht’n op de uutslag van ’t blood.