't Zwarte Schoap

Het blif mà duur zommern

Redactie

Redacteur

Het blif mà duur zommern

Gelukkig is ter een betje water evöll’n. Doar steet wier water in de Schipbekke. De sluuze biej Èèfde is wier lös. Veerder vuur de rest is ter nog niks veràànderd. Het blif nog altied môôi wèèr. Neet klaag’n, blieft geniet’n. Hôôlt wal in de smiez’n det ’t inmiddels september is. De daag’n wordt rap korter. De èèrste paddesteule scheet hier en doar al uut de grôônd. De balle rolt wier, wedstried’n wordt estaakt, umdet het publiek zich misdreg. Wat is det toch, stekpertiën op karms’n, wild west, zô mar in ôôns làànd. In Duutslàànd wint ne partië , woer een peerd de hik van krig. Ie heurt het opoe nog zô wier zegg’n, de weereld is kàànt kapot. Astebleef, loaw we der neet in met goan. Doar völt nog genog te geniet’n, ôk à steet de harfs vuur de duure. De balle rolt, ie könt wier kiez’n vuur oen favoriete clubje biej de Rabobàànke. Het maakt neet uut, nemt de meuite um het pepiertje in te vull’n, zôdet de vereniging’n wier een môôi bedrag könt besteed’n, ieder vuur zien eeg’n leefhebberieje. Doar is genog te doon. Inmiddels kieke wiej uut noar de Battemse Karmse. Oaver good twei wekke is ’t zô vèèr en köw we wier geniet’n van ôônze joarlijkse hoogmis. Loaw we hopp’n det het môôie weer zô lange stàànd heult. Gezellig noajoarswèèr, met goeie bericht’n uut het buut’nlàànd. Het buut’nlàànd! Hoe zal ’t in Den Haag goan. Hebt ze mekaar inmiddels evund’n met Prinsjesdag of geet de formatie gewoon vedan. Alles zôl better word’n. Schoof en kesjott’n hadd’n der niks van emaakt. Tut op de dag van vandaage markt wiej der nog neet völle van. Zie staakt an alle kàànt’n. Al met al vroag ie of, zôl het nog ôôit wier umme sloan of warke wiej oôns deeper en deeper in ’t moeras. Den zèèspeegel wördt als mà hèuger. Het ôônderhôôld an wèèg’n en brugg’n löp uut de klauw’n en goat zô mà vedan. Wat möw we der met? Maakt het neet te grôôt! Blieft biej oe zelf! Geniet van de môôie dinge, nog altied zommert het vedan.